Bátadagar 2.-4. júlí 2010

Þá er aftur komið að bátadögum.  Áætlað er að fara frá Stað kl. 9 .00 á laugardagsmorgun þann 3. júlí.  Æskilegt er að formenn báta komi með báta sýna föstudaginn 2. júlí.   Siglt verður út í Sviðnur stoppað þar í einn til tvo tíma þaðan er siglt með fram Skáleyjalöndum og Látralöndum norður úr Breiðasundi milli Sprókseyja og Véleyjar sunnan við Svefneyjaklofning og til Flateyjar .

Bátarnir safnast saman við Hrólfsklett og fara þaðan í röð út Hafnarsund út að eyjarenda í Flatey og til baka inn Hafnarsund til að fólk í Flatey geti fylgst með, vonandi verður góður tími í Flatey til að skoða eyna eða leika sér á bátunum.

Farið verður frá Flatey kl. 11 á sunnudagsmorgun til Hergilseyjar og þaðan sem leið liggur meðfram Hvallátrum og Skáleyjum að Stað.

Bátseigendur eða áhöfn þarf að sjá um að björgunarvesti og annan öryggisbúnaður sé í bátnum, koma með nesti fyrir helgina og annað sem hún telur sig þurfa ásamt tjaldi því gist verður á tjaldsvæði í Flatey

Í nokkrum bátum verða menn sem rata þá leið sem við förum , mikilvægt er að formenn sem lítið rata fylgi hinum og fari í kjölfarið, ekki til hliðar við þá því hluti af leiðinni er um þröng sund, kannski tvær til þrjár bátsbreiddir.

Kortinn hér fyrir neðan eru af siglingarleiðum  helgarinnar, rauða línan er sigling laugardagsins, en græna línan er sigling sunnudags. Við völdum að setja siglingarleiðina á þrjú kort  til að sína leiðirnar betur.

Kort 1

Kort 2

Kort 3

Vegna öryggismála er nauðsynlegt að þátttakendur skrái sig í ferðina.  Skráning fer fram á á netpósti artser@simnet.is.

Koma þarf fram nafn báts, nafn formanns og fjöldi farþega í bát.  Vinsamlegast skráið ykkur tímanlega.  Hlökkum til að sjá ykkur.

Námskeiði frestað

Ákvörðun hefur verið tekin um að fresta námskeiðinu ,,Viðgerðir og endursmíði gamalla trébáta“ fram í september vegna dræmrar þátttöku.

Þá mun verða lögð meiri áhersla á verklegan þátt.

Viðhald og endursmíði gamalla trébáta

                                                          

 

 

 

 Hefst 27. maí á Reykhólum

Námskeiðið um viðhald og endursmíði gamalla trébáta verður haldið á Reykhólum dagana 27. og 28. maí nk. Á námskeiðinu verður fjallað um hvernig íslenskir bátar voru viðaðir og gerð íslenskra báta. Hver eru heiti borða og áhalda sem voru um borð í Vestfirskum bátum, hvaða verkfæri voru (og eru) notuð við smíði og endursmíði bátanna. Talað um báta frá söguöld til Stanleys og farið yfir seglasaum og sjóklæðagerð.
Að loknum erindum verður frumsýndur leiðarvísir/mynd um hvernig smíðaður er breiðfirskur bátur eftir Ásdís Thoroddsen

Tími: 18.00—20.00 fimmtudaginn 27. maí og 9.00—15.30 föstudaginn 28. maí 2010

Kennarar: Ásdís Thoroddsen, Ágúst Ó. Georgsson, Eggert Björnsson. Hafliði Aðalsteinsson, Hjalti Hafþórsson, Jón Sigurpálsson og Þröstur Jóhannesson.

Staður: Hlunnindasafnið á Reykhólum

Fjöldi kennslustunda: 12

Verð: 12.500

 Hægt er að skrá sig hér

Við bendum á að félagsmenn stéttarfélaga eiga möguleika á endurgreiðslum úr starfsmenntasjóðum, oft allt að 75%.

Fundur stjórnar Félags áhugamanna um Bátasafn Breiðarfjarðar

Hér með boðar stjórn Félags áhugamanna um Bátasafn Breiðarfjarðar til aðalfundar félagsins sunnudaginn 11. október n.k. kl. 14.00 í Konnakoti, 2. hæð í húsnæði Barðstrendingafélagsins Hverfisgötu 105 Reykjavík

Fundarefni;

1.  Venjuleg aðalfundarstörf

2. Kosning stjórnar

3. Önnur mál

Nýir áhugasamnir félagar velkomnir.

f.h. stjórnar Hafliði Aðalsteinsson.

Fyrirhugað námskeið í viðgerðum og endursmíði gamalla trébáta

Eitt helsta verkefni Bátasafns Breiðarfjarðar er að geyma gamla báta og hafa þá til sýnis, koma á tengslum við skóla og æskulýðsstarf vítt og breitt um landið í formi fræðslu og námskeiðahalds í bátasmíði.

Fyrirhugað er að halda námskeið í byrjun maí á næsta ári í viðgerð og endursmíði gamalla trébáta.  Á námskeiðinu verður farið yfir sögu og þróun trébátasmíða á Íslandi. 

 

 

Fyrstu drög að dagskrá;

1. Bátar frá söguöld til Stanleys (Stanley er fyrsti vélbátur Íslendinga). Fyrirlesari Hjalti Hafþórsson

2. Hvernig voru íslenskir bátar viðaðir.

3. Gerð íslenskra báta.  Fyrirlesari Jón Sigurpálsson

4. Heiti borða og áhalda sem voru um borð í íslenskum árabátum.  Hvaða verkfæri voru og eru notuð við endursmíði bátanna.  Fyrirlesarar Þröstur Jóhannesson og Hafliði Aðalsteinsson.

5. Seglasaumur.  Fyrirlesarar Jón Guðbjartsson og Eggert Björnsson.

6. Heimsókn á viðgerðarstað báta.  Öll áhöld á staðnum.

7. Frumsýnt kennslumyndband um hvernig smíðaður er breiðfirskur bátur sem áhugamannafélag um stofnun Bátasafns Breiðarfjarðar lét gera.

Námskeiðið verður auglýst á vefnum og víðar þegar nær dregur.

 

Skinnklæðin vekja athygli.

Áhugamannahópur sem stendur að stofnun bátasafns Breiðarfjarðar hefur ekki eingöngu með handverk bátasmíða fyrri tíma að gera heldur lagt sig við að læra seglagerð, eldsmíði og sjóklæðagerð.  Mikil vinna hefur verið lögð í að afla heimilda um það handbragð sem tilheyrði gerð þessarra hluta.

Þau hafa vakið mikla athygli skinnklæðin góðu sem Eggert Björnsson félagi okkar frá Patreksfirði saumaði.  Um er að ræða eftirlíkingu af fyrstu gerð skinnklæða sem notuð voru sem sjófatnaður.  Skinnklæðin hafa alltaf átt hug Eggerts frá því að hann var ungur og teiknaði hann þau gjarnan.  Það tók hann um 3 ár af heimildavinnu áður en saumaskapurinn gat hafist og fóru 12 lambsskinn í klæðin.

Skinnklæðin hafa verið fengin að láni á nokkrar sýningar í sumar þ.m.t. á sýningu hjá Alliance Française í Reykjavík um síðustu mánaðarmót.  Hún er um veru franskra sjómanna við Íslandsstrendur á skútuöldinni og sýn Íslendinga á þessum framandi mönnum.  Myndirnar með fréttinni eru teknar þaðan.  Um 70 gestir mættu á opnun sýningunar þar á meðal Vigdís Finnbogadóttir og þóttu skinnklæðin afar áhugaverð.  Það var María Óskarsdóttir Patreksfirði sem fékk klæðin lánuð á sýninguna og að hennar sögn sló þögn á hópinn þegar Páll Óskarsson gekk inn í salinn í klæðunum,  fólkið vissi ekki hvaðan á sig stóð veðrið, svo mikil var undrun þess. Það vissi ekki hvernig það átti að bregðast við. Allt í einu var kominn þarna sjómaður frá liðinni öld, á meðal þeirra; í sjóskóm og með tvíþumla ullarvettlinga á höndunum. Sjóhatturinn á sínum stað og í hendinni bar hann gamlan fiskigogg. Þegar hópurinn fór aðeins að jafna sig vildu margir, sérstaklega þó konurnar, fá að koma við búninginn. Voru þau skoðuð í bak og fyrir af virtum gestum sem höfðu sumir talsvert vit á saumaskap.  Þar á meðal var Adda Geirsdóttir fyrrverandi skólastjórafrú Héraðsskólans á Laugarvatni. Hún er lærð húsmæðra- og handavinnukennari og hefur þaulæft auga fyrir vönduðu handbragði. Hún fékk að skoða búninginn nákvæmlega, ekki aðeins á réttunni, heldur rönguna líka. Því eins og þeir vita sem vandvirkir eru og kunnugir saumaskap, þá er ekki nóg að allt sýnist slétt og fellt að utan. Bakhliðin eða rangan þarf að standast prófið líka!  Hún dáðist mjög af handverkinu og því hversu vel búningurinn var unninn.

Fleiri aðilar hafa sýnt klæðunum áhuga og má nefna Ósvör sjóminjasafnið í Bolungarvík, líklega með það í huga að sauma einn slíkann.  Þeir höfðu samband við Eggert á dögunum og fengu helstu upplýsingar um sjóklæðagerðina.  Við óskum þeim góðs gengis með saumaskapinn.

Hjalti Hafþórsson

Heimsókn til Siglufjarðar

Á dögunum heimsóttum við félagarnir Hafliði, Eggert og Hjalti Síldarminjasafnið á Siglufirði þar sem síðari hluti samstarfsverkefnis Síldaminjasafnsins og Bátaverndarmiðstöðvar norður Noregs í Gradanger fer fram.  Verkefnið byrjaði þann 6. júlí s.l. þegar Björn Lillevoll og Skúli Thoroddsen hófu smíði á bát með eyfirsku bátalagi og fer smíðin fram í gamla slippnum á Siglufirði.  Það er ekki á hverjum degi sem það gefst tækifæri á því að vera viðstaddur smíðar af þessu tagi og því gerðum við okkur ferð norður og fengum að höggva niður í nokkur bönd í bátinn.  Þess má geta að Björn Lillevoll tók þátt í bátadögum með okkur og hafði gaman af, hann nýtti tækifærið til að skoða breiðfirsku bátana vel og leist mjög vel á.

Fyrri hlut þessa verkefnis fór fram í Gradanger síðast liðið haust en þá fóru fulltrúar frá Síldaminjasafninu í heimsókn í Bátaverndarmistöð norður Noregs til að kynnast og taka þátt í smíði á norskum feræringi undir leiðsögn Björn Lillevoll.  Undirrituðum var boðið að vera með í för til að kynnast starfsemi bátavendarmiðstöðvarinnar.

Hér fyrir neðan er smá fróðleiksmoli um eyfirskt bátalag, og sést þar hversu vel er við hæfi að smíðin á Siglufirði sé samstarfsverkefni á milli Íslendinga og Norðmanna.

Í frásögn Bjarna Sæmundssonar fiskifræðings í Andvara árið 1900 getur hann þess að bátar með Eyjarfjarðarlagi sé nokkurs konar samruni að eyfirsku og norsku handbragði.
Orðrétt segir Bjarni “Bátar hér eru all flestir með Eyjarfjarðarlaginu sem er sameining af lagi hinna gömlu Eyjarfjarðarbáta og norsku sjægte lagi, þeir eru góðir í sjó að leggja og vel lagaðir bæði til róðurs og siglinga. Þeir eru að smíði og frágangi vandaðri og smekklegri en aðrir íslenskir bátar er ég hef séð”.
Algengast var að á Eyjarfjarðarbátum væri fokka og ýmist spritsegl eða gaffalsegl. Helsta einkenni eyfirsku bátanna er að böndin koma upp með þóftum framan til en ekki undir þær miðjar eins og algengast var á öðrum bátategundum hér við land.

Kveðja Hjalti Hafþórsson

Bátadagar 2009 ákaflega vel heppnaðir

Um síðust helgi fóru fram Bátadagar 2009 á Reykhólum.  Það er áhugamannahópur um stofnun Bátasafns Breiðarfjarðar sem stendur að Bátadögum og var fjölmenn þátttaka í ár.  Hópur yfir 100 manns hélt úr höfn frá Stað á um 20 trébátum.  Siglt var í blíðskapar veðri um Breiðafjörðinn eins og dagskrá sagði til um.   Hópurinn fékk frábærar móttökur í eyjunum og slegin var upp matarveisla í Skáleyjum að hætti þeirra og kunnum við þeim bestu þakkir fyrir.  Áhugamannahópurinn vill þakka öllum þátttakendum fyrir frábær viðkynni, yndislega siglingu og vonast til að sjá sem flesta aftur að ári.

Á myndasíðu eru myndir úr ferðinni.

Með bestu kveðju,

Hjalti Hafþórsson Hvalfjarðarsveit.

Boatdays 2009

 

         Bátadagar   ferðaáætlun 11. og 12. júlí 2009

Farið verður frá Stað kl. 10 að morgni 11. júlí. Siglt verður út flóann meðfram Skákaskeri og Leiðarskeri í lendingu í Skáleyjum. Þaðan verður farið út Langeyjarsund, Brandssund meðfram Látratöngum og Lyklaskeri út á Bæjarsund í lendingu í Hvallátrum. Farið verður þaðan út Bæjarsund, Lokaskerssund eða Leiðarsund meðfram Sprókseyjum og Klofningi í lendingu í Svefneyjum, þaðan verður farið út Flateyjarsund og Hafnarsund til Flateyjar.  Þeir sem geta látið báta sína fjara þurfa að vera komnir í Grýluvog milli kl. 9 og 10 um kvöldið, þar verða bátarnir geymdir um nóttina.

sunnudagur 12. júlí

Kl. 10 (um flæðina) á sunnudagsmorgun þarf að taka bátana úr Grýluvogi. Farið verðir af stað úr Flatey kl. 13 sem leið liggur  um Eyjarendasund suður fyrir Svefneyjar í Sviðnur og farið þaðan um Sviðnasund meðfram Skutlaskerjum að Stað.

Stoppað verður á hverjum stað  í einn eða tvo klukkutíma, nema í Flatey þar sem gist verður. Rétt er að taka fram að sjávarföll ráða meira um ferðatilhögun en klukkan.

The date has been set for Boatdays 2009. The vote was for July the 11th and 12th. A number of boats will sail from the peer in Staður at Reykjanes Saturday morning  We will stop by at some of the islands on our way to Flatey where we will stay the night.

The group who handles the Boatdays 2009 is also working at Boatmuseum of Breiðafjörður at Reykhólar. We hope that most will be sailing their own boats old or new will be at this trip.

Welcome to our website!

This web has opened its eyes on the world wide web and will soon receive its upbringing. You are welcome to watch it grow up.